ولا إيه يا دكترة

"يا ختى عليك النبى حرصك مهندسة أد الدنيا...ممم و ما شاء الله بتحضرى ماجستير..يا سلام.. طبعا و على رأى المثل "المهندسة ماتخدش أقل من او يساوى  مهندس" ..اه طبعا..أمال إيه..عشان يبقى عبقرية معمليه فذه زى سعاتك...و عشان برضة تخلفولنا عَلَّمَه و لا مهندسين يكتشفوا سر بناة الأهرام و لا حتى يبنولنا ناطحات السحاب" كفاية كده و متنفخيش نفسك أوى و بلاش الالاطة ديه..إيه يعنى و على راى ستى "عدلتى المايل..حضرتك..إيه ناويه تذلينا و تذلى رجالة البلد بشهادتك؟"..طيب متزوئيش و لكن مهما فعلتى و دخلتى شهادة البكالوريا فى عينى ساقول بعلو صوتى و انا مش خايفة من حد وَلتَصْدّمْ من تريد و  زعقى و هللى و دبدبى فى الارض و لكنى سارفع شعار "المهندسة مش للمهندس و بلاش عقد." ودون إهدار دمى و طردى من عالم النساء، أود ان نناقش الأمر بهداوة و روية بعد أن رفع هذا الموضوع ضغطى و قربت على التعرض لجلطة دماغية و خاصة موضوع "المهندس للمهندسة و الدكتور للدكتورة" و لذلك أطلب منكم الصبر إشفاقا على حالتى الصحية و إذا كنت غلطانه هبوس راسكم كلكم...نفر نفر.

اه لسه فى العقلية ديه:

إننى لا أتطرق إلى هذا الموضوع من فراغ و لكن مازالت هناك بعض الفتيات المحترمات التى تفكر بنفس الإسلوب و على الرغم من نسبة العنوسة المرتفعه، و إننى بالطبع لا أود التطرق لأنه مش موضوعنا أو يفتكروا إنى بلمح لحاجة لا سمح الله، و لكن ما زالت هناك على هذا الكوكب كثير من الفتيات التى تطمح فى الإرتباط " مش أقل من دكتور و لا مهندس" على أساس إنهم هيعيشوا هندسة و حديثهم فى البيت هيكون على متوازى الأضلاع و الخرسانة و ما إلى ذلك. إننى بالطبع لا أحاول أن أقلل من شان المهندسات الكرام و لا من الطبيبات المحترمات و لكن لماذا لا تفكرون بالطريقة المنطقية المعملية بعيدا عن المورثات السخيفة و التقاليد التى إبتدعناها من أجل العقد ..اه عشان نعقد نفسنا أكثر.

التقاليد...هى السبب:

كم من مرة سمعتى هذه الجملة "المهندسة للمهندس" و لكن " إللى من ادبى زى حلاتى كده تاخد تجارة و لا أداب و لا حتى بواب" أنا طبعا مش بفرد عقدى و لا حاجة و لكن لماذا باتت هذه الجملة تتكرر على أذاننا منذ أن كنا صغار و لا نعرف هندسة و لا يحزنون. أقولك أنا ليه..اه والله هقولك..انا من المجمع "اقصدى الكليات النظرية" بس فكيكه و أمتلك من الذكاء قدرلا بأس به و الحمد لله..لأن أجدادنا و أمهاتنا ظنوا إن كل من دخلت هندسة و لا طب تمتلك من الذكاء و الفطنة  قدر كبير و بالتالى لن تستطيع ابدا التفاهم و التماشى مع واحد يعنى خريج "تجارة" و لا "أداب" و الذى يمتلك بالطبع معدلات ذكاء أقل و التى ستؤدى أن تصبح الحياة مستحيلة و بالطبع عشان البنت "متنتطتش على الواد و تفتكر نفسها أذكى" شايفين برضه دايما فى صف الولاد إذا كان تجارة و لا هندسة!!...ما علينا. و لذلك حرصت الأجيال و بالطبع التى اصبحت من المورثات أن "المهندس للمهندسة" و مفيش كلام فى الموضوع ده.

م.م. أو د: /د:/

لا ده مش هليوغريفى و لا حاجة و لكن ده سيم من الاخر..مهندس فلان متزوج من المهندسة فلانه...اه طبعا أمال إيه. تخشى بعض الفتيات التزوج بغير مهندس أو دكتور و خاصة إذا كانت من "م" أو "د" خوفا من العار الذى سيلحق بها أمام المجتمع. اه طبعا مهندسة إتجوزت أستاذ و "بالألف" يا ندامه و يا عيب الشوم.. و الأهم إزاى أقابل صحابى الدكاترة و المهندسين بيه و لا فى الكلية و لا قدام أقاربى و كأن كل من لم يتخرج من كلية الطب أو الهندسة مصاب بمرض الجذام أو التخلف العقلى. و بالطبع يجب أن تنساق وراء التقاليد و خوفا من أن تتفضح و تقول "يا شماتت أبله ظاظه فيا"

مهندس حمار..

مع إعتذارى لكل المهندسين و الدكاترة و لكن سوف أبوح ببعض الإمور و ليكن ما يكون...لماذا نظن جميعا أن كل من تخرج من هذه الكليات عَلامَه ؟؟على اساس إيه؟ مفيش و لا واحد كان بيسقط و لا قعد فى كلية الطب 20 سنه..هو المهم إنه مهندس و  لا دكتور و السلام..أمال اين العقل؟..و على رأى كاتبنا الكبير توفيق الحكيم " يوجد دكتور حمار و مهندس حمار" نعم لقد صدق القول..لا بلاش علامات الإستغراب التى على وجهك و لكن ألم تقابلى مهندس و على راى المقولة "ميح...أبيض يعنى..مبيفهمش" عادى كتير...و ربما قد تتزوجى من مهندس و إذا بيك تجدى عقلية لا سمح الله .... أو عقلية مهندس بالعكس..إذا فالمشكلة ليست فى نوعية الدراسة و لكن تكمن المشكلة فى الشخصية و درجة وعيه و علمه بإمور الحياة و على راى المثل اللى انا إخترعته "ليس كل من حفظ جدول الضرب مهندس و بيفهم فى الدنيا" خديها حلقة فى ودنك

مالهم بتوع تجارة:

و تاكيدا لما قلتله سابقا لإن الموضوع ده حازز فى نفسيتى اوى...إيه المشكلة لما مهندسة تتجوز محاسب و لا خريج أى كليه و لا حتى معهد..لا من غير ما تلطمى على وشك..ألم تجدى الكثير من هؤلاء...ياي..اقصد يعنى الجماعة اللى مش مهندسين بيفهموا و ما شاء لديه من الوعى و الخبرة مما يجعله سيد سيد أى مهندس...و لا هى عنطظة و بس.

التكأفؤ الإجتماعي:

اه شمه ريحتها من على بعد و شيفاها على طرف لسانك..و طبعا سوف تبدأون فى دخول الدين فى الموضوع  و التكأفؤ بين الأزواج. كوول طيب و عشان متزعلوش " أن يكون الزوج كفوءًا لزوجته. أي مساويًا لها في المنزلة، ونظيرًا لها في المركز الاجتماعي، والمستوى الخلقي والمالي" منقولة من لسان إحد الشيوخ الأفاضل ..ما علينا من الجوانب الأخرى لأنها ليست موضوع حديثنا و لكن خلينا باءه فى "المركز الإجتماعى" و الذى لا يعنى إن "الدكتور" يتجوز "دكتورة" و لكن أن يكون على درجة عالية من الوعى و الفهم التى تمكنه من التفاهم معا و العيش حياة سعيدة و ليس لعمل معادلة حسابية معا و لا لدخول المعمل معا!!. إذا فإذا توافرت شروط الشخصية الجيدة و التى تتناسب مع شخصيتك و على درجة كبيرة من التفهم إذا فعلى بركة الله و تبقى "م " إتجوزت "أ".

نفس الميول..و هى دي الخيبة بعينها:

طبعا عشان يترفع الضغط أكثر سوف تقول بعض الفتيات عشان يبقى عندنا نفس الميول..و النبى بلا خيبة ميول إيه..هل من المفترض أن تكون ميولكم واحدة و إنكم تيجوا من العمل كل يوم تصدعوا بعض بمشاكل العمل و سوف تجلسون معظم الوقت تتشاركون فى معلوماتكم عن الأمراض الفلانية و لا عن إحدى الالات. فالإختلاف مطلوب حتى تكون الحياة مسلية أكثر و عشان يا عبيطة لما تخلفى يبقى عندك كولكشن..يعنى دكتور و خريج مثلا فنون جميلة و لا محاسب أد الدنيا.

و مصائب قوم عند قوم...فوائد:

خديها منى نصيحة و بلاش نفس التخصص عشان النفسنة و التحدى. فكل من إتجوزت دكتور زيها مصيبتها سوده و يرجع الأمر للنفسنه أقولك ليه؟؟ لأنه سيحدث بينكما صراع و تحدى فى الإمور العلمية و بالطبع فى العمل فمثلا إذا كنت تقومى بالماجستير سيسبقك زوجك خوفا من أن تنالى لقب دكتورة قبل منه و يا داهية دوقى لو كنت بتشتغلى معاه فى نفس الشركة أو المستشفى و أخذتى ترقية..شوفى باه اللى هيحصل فى البيت...و عشان نتعلم من تجربة السابقين... إفتكرى فيلم "مراتى مدير عام"

الرك على الشخصية:

بالطبع سنبدأ فى تحليل نفسية الرجل "اللى مش مهندس و لا دكتور" و طبعا هنقول أول ما يجوز مهندسه حيجيله حالة تشنج و يعقدها فى حياتها و يخليها ربة منزل فقط و طبعا إحتمال وارد ينسيها الهندسة و لا الطب اللى هى فرحانه بيه... و إحتمال يمحلها دماغها خالص نكايتا بها و طبعا لأنه مفروس و متغاظ لأنها خريجة هندسة فحيسود حياتها يا كبدى...مبلاش نظام الافلام العربى دي و حقوق المرأة و الحجات الغريبة التى تورد علينا و تعشش فى دماغتنا من غير سبب....إذا كانت العقد النفسية موجودة و التى أقر بوجودها ..فهى موجودة فى الدكتور و العالم و المهندس و الزبال. أقصد إنه بتزوجك المهندس أو الدكتور لن تتفادى التعرض لمثل تلك العقد و كم من رجل رأيت يملك شهادة علمية و لكنه أجبر زوجته على المكوث فى المنزل و نساها هى و اللى خلفوها اللى درسته. و كم من رجل "من تجارة" و لا خريج أى كليه أخرى إلا و شجع زوجته فى مجالها حتى و لو كانت دكتورة و لا مهندسة. الهدف من كل اللى قلته أن المشكلة تكمن فى شخصية الرجل و قدرته على التفهم و خلوه من عقد الشهادات و إلخ و التى يمكن ان تكون فى أى رجل.. و مش بالشهادات يا دكتورة.

ماذا اريد؟

اه و بعد إذنكم يعنى..أطلب من كل فتاة التركيز جيدا على شخصية فتى أحلامها و كفاية باه سماع لكلام ستك و التقاليد و العيب و المورثات و حكمى عقلك...و الشروط التى يجب توافرها فى شريك أحلامك طبعا بعيدا عن الحب الحب و الكلام الجميل ده..أن يكون على درجة عالية من الوعى و التفاهم، قدرته على المناقشة، حيادى، مطلع، يتطلع إلى المستقبل، طموح، ذو سلوكيات طيبة متفوق فى عمله و يحرص على أن يكون الافضل مهما كان مجال عمله و طبعا ضيفى باه كل اللى بتحبيه... قشطة؟؟

و لحسن الختام يجب ان نتوقف قياس إحترامنا للشخص بقياس مجموع الثانوية العامة. و على الرغم من كون الطب و الهندسة من احسن الكليات الان يجب أن أذكركم أن كلية الحقوق كانت من افضل الكليات من كام سنه ..فربما "تجارة و اداب" سوف تصبح كليات القمة فى السنوات القادمة و شوفوا بقه لو خريج كلية تجارة رضى بخريجة طب..ياى مش من مستوايا.